講下<年少日記>
本來諗住睇<白日之下>,結果因為時間關係最後選了<年少日記>,結論是:好睇,好撚 mind-fucked,而黃梓樂的演出精彩非常,完全唔似一個九歲的孩子,此子實非池中之物,可見將來前途無可限量。
老規矩,全篇劇透,介意或者未入場嘅就自己迴避啦。
電影開場第一幕就已經很震撼:黃梓樂走上天台石膞,然後跳咗落去。正當全場都嚇咗一跳之際,黃梓樂的身影再次出現 — 原來下面仲有一層。然後黃梓樂對住外面大叫「鄭有傑你呢個垃圾你要應承我,要畀心機讀書,讀港大!」
之後小野飾演的鄭Sir 出現,一個疲憊、被現實磨蝕的班主任。作為班主任的他在面對班上學生把別人推下樓梯時,只能勸喻「大家都係朋友,無論發生咩事都唔可以推人落樓梯」。他嘗試用學生的花名「蛋糕」來拉近雙方的距離,嘗試讓學生寫道歉信好讓學生不用記過,但學生 Vincent 卻毫不領情,同時我們都知道鄭Sir正面臨離婚。
因為清潔大叔在班級的垃圾桶找到一封被撕碎的遺書,所以校長、副校長找來社工蝦姐及鄭Sir開會,希望找出寫遺書的學生。
校長擔心的是遺書會影響學生考DSE的成績,而副校長則是揶揄遺書的文筆不錯,並戲謔也許只是學生在網絡抄回來的,並不是真的想自殺。鄭Sir聽後激動地罵副校「你個仆街咁都講得出,咁如果係真嘅咁點?」。
但下一秒我們知道,一切都只是鄭sir的想像。他沒有破口大罵,只是說自己會和班上的學生談談,找出寫遺書的學生。
回到家的鄭SIR找出妻子林雪兒提及的河馬公仔,並從塵封的書包中找到一本陳舊的日記。而隨着鄭SIR翻開日記,我們也正式走進「鄭有傑」(傑仔) 的世界。
從日記中,我們知道傑仔有一個很會讀書會彈琴的哥哥,知道傑仔成績不好要留班; 知道他喜歡看漫畫 <Pirate>,一直憧憬着<Pirate>中「成為自己想做的大人」; 我們知道傑仔也有學彈鋼琴,但一直都學得不好,學了好多個月連一首完整嘅歌都彈唔到; 我們知道他向教他彈琴的 Miss Chan 講,他希望自己將來可以成為一個,「就算學生成績不好都唔會鬧佢,而是關心他係唔係唔開心的老師」。
我們也能從中理解到鄭有傑的爸爸是一個怎樣的人。他會因為妻子出了風頭而大發脾氣,咆哮着「呢間屋所有嘢都係我買!」並動手打她,會因為鄭有傑半夜偷看到他打母親的場面就走入去佢間房度打他、撕碎他的漫畫並趕他出門口; 他的教育哲學就是「教育方式有好多種,其中一種就係唔識就打到識,而其他方法都係錯嘅」﹐因為「我都係咁之嘛,所以我搵錢多過你阿媽。」
而隨着劇情發展,我們知道因為傑仔的琴一直都彈得不好,所以其父換走了溫柔的 Miss Chan 而換上了嚴厲的陳湛文; 而陳湛文一次又一次的「唔啱,再來。」令傑仔喊住咁抱住媽媽,話自己想要返 Miss Chan,但陳湛文只係講咗句「彈琴有時係會好辛苦,我哋等傑仔喊完再繼續。」
事實上,我覺得成套戲最觸動我的,是韋羅莎的母親角色。有人批評她是個不負責任的媽媽,但在我看來,與其說她是不負責任,倒不如說她真的太累。
她並不是不愛成績差的傑仔,亦不是不關心佢,她有嘗試平等地看待兄弟二人 — 例如勸丈夫一同帶要留班的傑仔去旅行,例如會在傑仔話自己會努力讀書考到第十五名內,但丈夫只顧着食早餐沒在意時偷偷示意丈夫鼓勵兒子。